Amir ئەمیـــــــــــــر

نزیك دوو حه‌وتوو ده‌بێ‌ كۆماری ئیسلامیی‌ ئێران به‌ بیانووی نیشته‌جێ‌ بوونی ژماره‌یه‌ك دژه‌به‌ری رێژیم له‌سنووری هه‌رێمی كوردستاندا، هێزیكی زۆری له‌سه‌ر سنووره‌كان مۆڵ‌ داوه‌و له‌ راگه‌یه‌ندراوێكی سپای پاسدارانی ئێراندا هه‌ڕه‌شه‌ی‌ له‌ گوندنشینه‌كانی سه‌ر سنوور كردووه‌ كه‌ ماڵ‌و كێڵگه‌كانیان به‌جێ‌ بێڵن بۆ ئه‌وه‌ی‌ نه‌كه‌ونه‌ به‌ر هێرشی‌ تۆپ‌و كاتیۆشاو بۆمبارانی هه‌وایی. به‌دوای‌ ئه‌وه‌دا هێرشه‌كانی‌ خۆی‌ له‌ رۆژی 23/8/2007، له‌ ناوچه‌كانی خنێره‌ لۆڵان، قه‌ندیل، باشماخ‌وچه‌ند شوێنێكی سنووری دیكه‌ به‌ تۆپباران‌و بومباران ده‌ست پێ‌كردووه‌و له‌ ئاكامدا ژماره‌یه‌كی زۆر له‌ خه‌ڵكی گونده‌كانی سه‌ر سنوور له‌ رووی‌ ناچاری‌ ماڵ‌‌و مووچه‌كانیان به‌جێ‌ هێشتووه‌و زیانێكی زۆۆری ماڵی‌و ته‌نانه‌ت گیانیشیان لێ‌كه‌وتووه‌.

كۆماری‌ ئیسلامیی‌ ئێران به‌و كرده‌وه‌ دژی‌ مرۆڤانه‌یه‌ نیشانی‌ دا كه‌ ئه‌و ته‌نیا به‌وه‌ قه‌ناعه‌ت ناهێنێ‌ كه‌ به‌ پشتیوانی‌ كردنی‌ تیرۆریسته‌كان ئاسایشی‌ عێراق بشێوێنێ‌‌و ده‌ست له‌ كاروباری‌ ئه‌و ولاَته‌ وه‌ر بدا، به‌ڵكوو له‌ لایه‌كی‌ دیكه‌وه‌ به‌ هێرشی‌ سه‌ربازی‌‌و توپباران دژایه‌تیی‌ خۆی‌ له‌گه‌ڵ كورده‌كانی‌ ئه‌ودیوی‌ سنووریش رابگه‌یه‌نێ‌‌و ببێته‌ هۆی‌ ئه‌وه‌ی‌ ئه‌و باغ‌و كێڵگانه‌ی‌ دوای‌ رووخانی‌ حكوومه‌تی‌ سه‌ددام حسین به‌ ره‌نجی‌ شانی‌ جووتیارانی‌ ئه‌و ناوچه‌ سنووری‌یانه‌ ئاوه‌دان كراونه‌ته‌وه‌، جارێكی‌ دیكه‌ به‌ بڵێسه‌ی‌ ئاوری‌ چه‌كه‌كانی‌ رێژیمی‌ كۆماری‌ ئیسلامیی‌ ئێران بسووتێندرێن.
 ئێمه‌ وێڕای مه‌حكووم كردنی ئه‌م هێرشه‌ ناڕه‌وایه‌ ده‌ربڕینی‌ هاوده‌ردی‌ خۆمان له‌گه‌ڵ گوندنشینه‌كانی‌ ئه‌م ده‌ڤه‌ره‌، داوا له‌ رێَكخراوی نه‌ته‌وه‌ یه‌كگرتووه‌كان، له‌ ده‌وڵه‌ت‌و وڵاته‌ دێموكراتیكه‌كان، كۆڕو كۆمه‌ڵه‌ به‌شه‌ردۆسته‌كان‌و به‌گشتیی هه‌موو ئازادیخوازانی جیهان ده‌كه‌ین، له‌ هه‌مبه‌ر ئه‌م هێرشه‌ بێ‌ده‌نگ نه‌بن‌و به‌ گوشار خستنه‌سه‌ر رێژیمی ئیسلامی ئێران، ناچاری بكه‌ن هێزه‌ هێرشكه‌رو جینایه‌تكاره‌كانی بكشێنێته‌وه‌ بۆ ناچه‌كانی خۆیان‌و توپبارانی‌ ئه‌م ناوچانه‌ رابگرێ‌.